كلمه وطن- بقلم-سعيد عزب

أو حرف عطف …… ……. بيداعب حنين

الوطن …….أمن وسكن

..ومستقبل جنين

الوطن ……عمرى اللى راح

واللى جاى من سنين

الوطن …….للى عايش فى القصور

واللى ساكن عالرصيف

للى واكل شهد عسله

واللى مش لاقى الرغيف

للى ليله زى نهاره نور

واللى ساكن فى القبور

للى عالجوله الهوا

واللى مش لاقى الدوا

الوطن ……للى شايف بكره أحلى

واللى اعمى أو اصبح كفيف

الوطن …….مش بس عزبه للوزير

هو برضه عزوه للفقير

الوطن ……مش بيع وشروه

والا سلعه تحتاج فصال

الوطن …….مش أرض وسما

واللا رسمه للحدود

الوطن ……للى عايش

واللى لسه هايتولد

الوطن عضم الجدود

الوطن ……حقى وحقك

حتى من حق الضيوف

الوطن …….حق الحياه و ا لوجود

مش للى حالف رأى غيره

يلغى حقه فى الوجود

الوطن …….مش للى خان

واللى هان يوم عليه

دم أخوه

الكل واحد فى الوطن

طلقه واحده فى قلب المغير